Prins Wil I

Prins Wil I
"6 kieër 11 sjleit de maot, Vastelaovendj in Grathem, met jonk en aod!"

Proclamatie Prins Wil I

Ich Prins Wil de 1e, bie de gratie van President Hen, Vorst Bob en de Raod van Elf, 66e en daomèt jubileum prins van de Foekepotters in ‘t jaor 2015, proklameer hie bie ’t volgendje:

Ten 1e
Det ich ’t ein groeëte ier vinj óm mèt dit jubileumjaor vuuerop te gaon en wae d’r dus same, nog mier es anges, ein fantastisch fieëst van gaon make, woeëbie neet allein ich, mer ederein toet ’t uuterste zal gaon.

Ten 2e
Det wae ouch dit jaor stil staon bie diegene die neet met os met kinne doon. En det wae bie die minse langs gaon tiedes ’t zeeke bezeuk zodet ze toch get van de vastelaovendj met kriege.

Ten 3e
Det ich same met het 33e jeugdprinsepaar, Max 1e en Jessy 1e en de jeugdraod der ein groeët fieëst van gaon make, vanaaf de Sjluueteluueverdracht toet en mèt de ’t balonnen oplaote op dinsdig.

Ten 4e
Det de Boorekapel Door Diek en Dun ouch dit jaor weer van zich leutj huuere. En det de muziek weer flink moog klinke in het Foekepotterslandj.

Ten 5e
Det ich ’t tennisracket en de volleybal en ouch de vuuerzitterhamer van Jong Nederlandj dees daag oet henj gaef, ómdet ich de scepter stevig vast höb. Mer ich de jonges van miene jongste senioren groep verwacht óm flink mèt te fieëste, natuurlik same mèt alle angere JN’ers, en ouch de tennissers en lede van Neet oet DAB én det die Sjengen in Mestreech ein tendje bie zulle motte zètte, want ich laot mich die daag op ’t werk neet zeen.

Ten 6e
Det ouch op sjoeël flink vastelaovendj geveerdj waerdj dit jaor en ‘t sjoeëlproject Pats, Boem Paaf Foekepot Alaaf ein groeët succes moog waere, en es ich mót kómme helpe, hoove ze mer te vraoge.

Ten 7e
Det wae tiedes het jubileumweekendj gaon Fieëste wie de Bieëste, oppe klanke van de Janse Bagge Bend. En met de vastelaovendj zelf gaon geneete van de Galazitting, van oos eige Grathemse artieste tiedes de Foekepop en det ouch de optocht weer ein waar spektakel moog zeen.

Ten 8e
Det de buurt zal weite det ’t vastelaovendj is, noe zie dit jaor de Prins en de jeugdprins inne straot höbbe. Ein waor prinsenstraot dus, zoeëdet de ganse buurt mèt fieëstj.

Ten 9e
Det wae op vastelaovendjsdinsdig tiedes de Kinjer boore broeloft der eine sjoeëne middig van make samen met ’t kinjerboorebroeedspaar, en gae daobie natuurlik allemaol moogtj komme kieke.

Ten 10e
Ouch deze Prins heet natuurlik hulp en steun nuuedig en ich daorom tot mien adjudante benum:
Mien sjoeënbroor Rob Evers & Vincent Rommelaars, die es ervaringsdeskundige aod Prinse mich door dit jubileumjaor kinne helpe.

Ten 11e
De Foekepotters dit jaor vastelaovendj vere ónger mien motto:
6 kieër 11 sjleit de maot, Vastelaovendj in Grathem, met jonk en aod!