Proclamatie
Foekepotters en Foekepotterinnekes, leef Grathemer en anger vastelaovesgekke.
Bie t goodvinje van President Hen,Vorst Bob en de alwieze Raod van Elf, proklameer ich, Prins Martijn de ieerste van de Foekepotters in t jaor 2018, hiebie ‘t volgendje:
1. Det ich dit jaor prins zal zeen, det gaaitj mich zieer, want vuuerop moge gaon bie de luuj van ’t sjoeënste durpke in de wieje ómtrek vinj ich ein groeëte ieër.
2. Det mien broor, kepelmeister Koen, de jonges en maedjes van Door Diek en Dun mer lueetj traöte vueer drie, want ‘t daak mot d’r vanaaf hie!
3. Det bie de luuj die vanwaege haör gezondjheid dees vastelaovendj naeve de kantj mótte staon, wae tiejes ‘t zeekebezeuk efkes met ein sjoeën puiske bloome langs zal gaon.
4. Det os pap en mam mer alvast get gaon ruste. Gae zitj den waal neet zelf bie kepel of raod, mer as aojers van de prins motj gae met die daag net zoeë hel mèt geneete, en det kosj flink get draod!
5. Mien tennisracket en auch de projecte bie GEA gaon hieël efkes aan de kantj. Want mèt de vastelaovendj hub ich hieël get anges aan de handj.
6. Jeugdprins Niels en jeugdprinses Inge, gae gingtj al ein paar kieër flink d’r aan. Mer mèt die daag gaon wae ‘t nog get bontjer make, dao kintj gae van opaan!
7.JongNL mót ‘t mèt die daag mer hieël efkes zonger mich sjtèlle. Mer det kumtj good, die zeen toch hie in de zaal. Ueever vastelaovendj vere hoof se die namelik niks te vertèlle.
8. Det wae vueer de galazitting op vaöl bekieks hope, en det ich ‘t fantastisch vinj det ich es Prins dao vueer ‘t ieerst de Foekepotter van ‘t jaor oet moog rope.
9. Det vueer t geval mich nao ‘t aete hieël efkes de uig toe zulle valle, de men van de raod zich waal ein dink good in de oeëre motte knuipe. Dit jaor kinne ze neet zoeëmèr zonger mich d'r tussenoet sluipe.
10. Ich höb mich det ein paar jaor aafgekeke en ‘nne Prins dae duit toch mer eine hieële boel. Daovueer laot ich mich den auch gaer ongersteune door ein paar flinke adjudante, namelik: Joost en Roel!
11. Dèt ich dees daag vuuerop zal gaon ónger ’t motto:
Jònk en aod, gans Grathem fieëstj zich oet de naod!
Gegaeve bie Robert inne zaal, op 27 jannewari 2018
