Prins Jan-Willem I

Jonk en aod, niks te gek, Vastelaovendj in Grathem, det is nog geine poppedrek!

Ich, Jan-Willem de ieërste, in blood half Geitebok en half Plaggenhouwer, mer geboeëre en getoeëge in oos eige Foekepotterslandj, gruuetse pap van Sam en Juul, adjudant van jeugdprins Noud in 1997, aod-lid van Boorekapel Door Diek en Dun en al enige tied lid van de Raod;

Noe, bie de gratie van Vorst Bob en de Raod van Èllef, 74e prins van de Foekepotters in ‘t jaor 2023;

Proklameer hiebie ‘t volgendje:

Ten 1e

Det ich gruuets bön det ich nao óngerhalf jaor ’t bèst bewaardje geheim van Grathem vuuer mich te höbbe mótte haoje, nao vandaag d’r nemes mieër hooftj te raoje.

Ten 2e

Det wae met de Zomervastelaovendj allemaol höbbe laote zeen det wae nog altied kinne fieëste, en det wae dao noe nog eine flinke sjöp boeëve-op gaon doon en vief daag lank toet in de late eurkes zulle tampieëste.

Ten 3e

De basgitaar geit aeve aan de kantj, want mèt dees daag höb ich hieël get anges aan de handj.

Ten 4e

Meziek zitj in mien hert en nere, mèt de Boorekapel vuuerop, de Foekepop en drie daag livemeziek, barstj ’t vanne muzikale klanke in ’t Foekepottersriek.

Ten 5e

Det de wuueningboe op de voetbalveldje dees daag hieël aeve op ein lieëg pitje kumtj te sjtaon, en det wae daomèt nao de Vastelaovendj weer volle gaas wiejer zulle gaon.

Ten 6e

Det wae same met Jeugdprins Bram en Jeugdprinses Pleun, de ganse Jeugdraod, en alle kinjer in Grathem kei hel d’raan zulle gaon, en det daobie nemes aan de kantj sjtil blieftj sjtaon.

Ten 7e

Vuuer de luuj die ’t aeve neet zoeë lekker geit, zurge wae det d’r op zaoterdig ein bleumke klaorsjteit. En de luuj die get speciaals höbbe gedaon moge met de galazitting nao vuuere gaon.

Ten 8e

Det wae met de jeugd- en groeëte optocht mèt eine geweldjige sjtoet doeër ’t dörp zulle gaon, en det daonao op maondig de Mertj weer ramvol kumtj te sjtaon.

Ten 9e

Wèrke, tennis en fietse laot ich noe vuuer waat ’t is, toet wae op As-goonsdig aafsjloete mèt ein lètste pilske en eine zore vès.

Ten 10e

Prins zeen bie de Foekepotters, dao kins se neet vuuer lieëre, daorom laot ich mich gaer doeër mien adjudante Martijn en Wil assistere.

Ten 11e

Det ich dees daag vuuerop zal gaon ónger ’t motto:

Jonk en aod, niks te gek, Vastelaovendj in Grathem, det is nog geine poppedrek!