Wae,
Prins Max de ieërste
jóngkhieër vanne Kantjeneer toet Hagerberg, solo-trompettist in spee en goaltjesdeef op ’t voetbalveldj
&
Prinses Jessy de ieërste
höb oeëts de langste haor vanne Alexanderstraot gehadj, bieëstevrindj in hert en neere en toch bang vuuer griezelige sjpinne
verklaore as drie-en-dertigste jeugdprinsepaar vanne Foekepotters
in ‘t jaor twieëdoezendjvieftieën bie deze:
ten ieërste
Vuuerig jaor woor ´t jeugdprinsepaar Stan & Anke,
gae woordj super vèt cool en wae zegke: danke, danke, danke
ten twieëdje
Ich legk de voetbalsjoon en trompet aeve tiedelik ane kantj,
helaas sjpelers vanne D-twieë en Jong Tumult, ich höb noe get angers inne handj
ten derdje
Mèt dees daag get minder knuffels vuuer Levi en de bieëste,
want ich höb ´t noe te drök mèt al det fieëste
ten veerdje
Hoeswerk van juf Kristel waerdj vuuerluipig neet gemaaktj,
want wae zeen doeër ´t “Pats, Boem, Paaf Foekepot Alaaf” project geraaktj
ten viefdje
Väöl tamtam en kabaal huuertj bie oos geweldjige borekèpel,
laot uch huuere in gans Leudal en houwtj duchtig op det vel
ten zèsdje
Wae zeen gruuets oppe optochte en kinjerborebroeloft in ós Foekepottersriek,
al is d´r raegen, windj of snieë, wae loupe polonaise, hosse en sjpringe op meziek
ten zevendje
Oos leiders van Jóng Nederlandj sjtaon normaal altied vuuer oos Paraat,
noe drei-je wae de rolle óm en maaktj gae ´t mèt ós hieël erg laat
ten achste
´t gruite en gezóndj laeve laote wae efkes achterwaege,
eine vètte hap mèt cola . . . en wae kinne d´r weer daag tieëge
ten negendje
Det groep acht van De Klink as jeugdraod noe vuuerop geit,
wae gaon flink d´raan en zulle doeër gaon toet nemes mieër rechtop sjteit
ten tieëndje
Det ós adjudante dit jaor zeen: . . Fer . . en . . Mirthe,
die kinne deze vastelaovendj dus neet röstig achteruuever zitte
ten èlfdje
ouch wae zeen allemaol gek op de èlf
de vastelaovendj begós de èlfdje-vanne-èlfdje
wae twieë zeen toevallig allebei eine kieër èlf
wae vorme dit jaor same de jeugd-raod-van-èlf
en dèt alles ónger oos motto:
De magische èlf zitj ós in ´t blood,
mét drie-kieër-èlf én zès-kieër-èlf,
waerd deze vastelaovendj bieëstig good!
sjoeëne vastelaovendj same, A L A A F !
