Op zaoterdig 27 jannewari 2024 hele De Foekepotters vuuer de 75e kieër häör prinsebal. De sfeer zoot d’r al sjnel good in, en de Foekepotters en Foekepotterinnekes wore natuurlik weer benoedj waem det häöre belangriekste man vuuer de kómmendje vastelaovendj zooi gaon waere. Net es de bezeukendje prinse van D’n Uul van de Grauwert oet Mofert, van de Plekploaster oet Baoksum, de Kwakkert oet Heytse en van De Bokkeriejers oet Sint Joeëst en häör gevolg, sjting ederein te wachte toet de noewe prins bekindj zooi waere. Want neet allein is ’t sjiek te weite waem, en of des se good geraoje höbs, mer ’t is ouch traditie det nao ’t oetrope ein fantastisch fieëst lastbarstj bie Zaal Geraats.
Dus, dao ging ’t loos. De oetroopceremonie besjting oet “De Aoje Grathemer” ein Grathemse versie van ’t OLS. Naodet diverse sjötters haje gemistj, sjoot de letste gelökkig raak en sjting hae oppe bühne, oose noewe prins: Bert Engelen, Prins Bert I.
Bert is eine richtige Grathemer. Hae waerdje hie geboeëre en hieët zien ganse laeve in oos dörpke gewoeëndj. Hae is 3 x 11 jaor aod en veertj zoeë lank es hae zich kin herinnere al vastelaovendj. Same mèt ziene vrinjegroep APK hieët Bert jaorelank wages geboedj en mètgetrokke inne optocht. Daobie veel häör vakmansjap en aafwerking op, mer ouch de sjieke presentatie. Zie vele den ouch dök in de prieze. Bert woeëntj mèt zien leef Lindy (Op het Veld), ein maedje oet Putbrook, aan de randj van Grathem. Same höbbe zie twieë kinjer, Sen van vief en Bente van drie jaor.
Bert werktj bie de Groba es service engineer. Groba meuktj mesjiener vuuer ’t verwerke van kieës, en zónger Bert geit det neet. Hae seistj daovuuer de ganse waereldj uuever óm die dinger te installeren, óngerhaoje en te programmere. Verder is Bert eine henjige jóng. Waat hae zuut kin hae make. Hae klustj gaer aan hoes of bie femilie of vrunj. Ziene vrieje tied spendeertj hae gaer aan de kinjer, woeë bie ein oetsjtap nao sjpeeltuin of dierentuin hoeëg scoortj. Ouch wanjele mèt de hóndj vindj Bert sjoeën. Es ’t aeve kin is ein vakantie mèt de caranvan same mèt Lindy en de kinjer ouch get waat Bert hieël gaer duit. Bert is lid van CV De Foekepotters en actief in de werkgroep jeugd van oose dörpsraod. Dao helptj hae mèt bie de organisatie van versjillendje activiteite wie de intocht van Sinterklaos, Kuueningsdaag of ’t Statie Rouke.
Kortom. Bert is eine fijne en good gezene mins in oos dörp dae al jaore op zien eige meneer zien biedrage levertj in oos gemeinsjap. De Foekepotters zeen den ouch gruuets det hae es Prins Bert I tiedes de vastelaovendj vuuerop zal gaon. Bert hieët zich verzekerdj van de hulp van twieë adjudante, namelik Ron Steijven en Barry Evers. Hae zal bie de Foekepotters vuuerop gaon ónger zien motto: Noe geine boe of robot programmere, óm mèt uch keihel vastelaovendj te vere.
Ich, Bert de Ieërste, drie maol èllef jaor geleje geboeëre in oos eige Foekepotterslandj, gruuetse pap van Sen en Bente, APK’er ieërste klas, adjudant van prins Mike waal drie jaor lank,
in alles gesteundj doeër mien maedje Lindy
Noe, bie de gratie van Vorst Bob en de Raod van Èllef, 75e prins van de Foekepotters in ‘t jaor 2024
Proclameer hiebie es volgtj:
Ten ieërste:
Det ich gruuets bèn dit jaor veuürop te moge gaon,
en ich mèt sjteek en vaere veuur de lingte neet op ein trepke hoof te gaon staon.
Ten twieëdje:
Det de ganse jeugd van ‘t Foekepottersriek flink kintj gaon fieëste,
mèt dae Mega jeugdraod en ‘t jeugdprinsenpaar Amélie en Devin de Ieërste.
Ten derdje:
Det mien vrunj van Adje Paeperkook de optocht neet moge verzake. Want ouch zónger puntje kinne zie ‘t publiek good vermake.
Ten veerdje:
Det ze ‘t zich bie de Groba noe mer oet mótte zeuke,
want mèt die daag höb ich geine tied vuuer stuueringe of servicebezeuke.
Ten viefdje:
De luuj die doeër gezondjheid de de vastelaovendj motte skippe,zulle wae aug dit jaor neet vergaete,
en bie häör aeve met ein bleumke binne wippe.
Ten zesdje:
Det Door Diek & Dun zich neet hooftj te laote kinne,
zoeëdet ze oppe Bröksjtraot weite det ’t bie Oad Bertus
nog laat kintj gaon beginne.
Ten zevendje::
De Werkgroep jeugd mèt dees daag niks vuuer die men hooftj te organisere,
want de jeugd is al hie,
zoeëdet zie ouch volop vastelaovendj kinne vere.
Ten achste:
Wae op zaoterdig en maondig ein paar sjoeën optochte kinne belaeve,
dus jónk en aod, einselgenger, groep of wage,
zörg detj gae uch allemaol höbtj opgegaeve!
Ten negendje:
Det wae op ‘t mertjfieëst weer eine Bachus oet moge rope,
dae wae den sjoeën aan zulle kleije,
en daonao same met hem oppe dinsdig de Foekepot oet zulle zjweije
Ten tieëndje:
Det ich toet mien Adjudante benum:
miene goje vrundj Barry en mien werkgroep compagnon Ron,
ómdet ich weit det dees men d’r vol vuuer zulle gaon,
en mich mèt die daag bie zulle sjtaon.
Ten elfdje:
Det ich draan gaon ónger mien motto:
Noe geine boe of robot programmere, óm mèt uch
keihel vastelaovendj te vere.
Alles gegaeve op zaoterdig 27 jannewari 2024 bie Robert inne zaal.
Alaaf!
