Leef Foekepotters en Foekepotterinnekes,
Eine tied lank höbbe wae de hoeëp gehadj det de vastelaovendj in welke vorm den ouch doeër zooj kinne gaon.
Helaas mótte wae noe constatere det wae mèt alle maotregele die recent zeen getróffe, geine vastelaovendj kinne veere wie wae det gewintj zeen same.
In eder geval höbbe wae besjloeëte óm gein Jeugdprinsepaar en Prins vanne Foekepotters oet te rope vuuer 't vastelaovesseizoen 2020/2021. Ouch zulle d'r gein activiteite georganiseerdj waere in 't vuuerseizoen (Bóntje Aovendje en Senioremiddig). De uueverige activiteite die wae normaal tiedes de vastelaovendj same met uch veere zulle ouch neet doeër gaon (Prinsereceptie, Gala-Zitting, Foekepop, Kinjer- en Groeëte Optochtj, Groeëtste Boor).
Zoje de maotregele 't toesjtaon inne aanloup nao de vastelaovendj den zulle wae de meugelikheje ongerzeuke op det moment en uch dao uuever informere.
Dao naeve zeetj gae natuurlik benoetj wie det noe wiejer mót met Prins Mike I!
Prins Mike I zooj normaal gesjproeëke nog bie ein aantal activiteite aanwezig zeen toet 't oetrope vanne nuje prins. Aangezeen dit seizoen geine prins wuuerdj oetgerope zal Mike es prins vanaaf de start van 't seizoen 2021/2022 zien take weer óppakke toet aan 't formele aaftraeje in 2022.
Omdet Mike besjloeëte hieët óm zich aan te sjloete bie CV De Foekepotters zal hae toet de start van 't seizoen 2021/2022 as lid vanne Raod mèt doon aan eventuele activiteite die mesjien (hoeëpelik) nóg waal meugelik zeen.
Wae hoeëpe det gae allemaol gezóndj blieftj.
Namens,
Prins en leje C.V. De Foekepotters
Blief oze social media inne gate haoje vuuer eventuele nuje info, det kin via oos website, Facebook, Twitter óf Instagram!
