Tiedes de galazitting op zunjig 2 mieërtj hieët Prins Tim, same mèt de ganse raod besjloeëte det de titel van Foekeoptter van ’t Jaor vuuer 2025 geit nao nemes minder as:
Rosalie Brouwer
Rosalie is beeldjendj kunstenares en haet huuer eige atelier RDJ Arts, aan hoes hie in Grathem. Rosalie woeëntj nog neet zoeë lank in oos dörpke. Zie is aaf-kómstig oet Rotterdam en opgegruudj in Ridderkèrk.
Rosalie haet ’t idee gehatj óm ein sjilderie te make woeë-in Grathem zèk mer gevange zooi waere in kluuere. Bezunjer is det de minse óm häör haer die kluuere mèt bepaaldj höbbe. In det werk herkins se oos dörp as se op zeuk geis nao de versjillendje plekke die d’r te zeen zeen. Mer mieër nog zuus se Grathem wie Rosalie ’t zuut. Zoeë ouch in de expositie bie de onthulling van ’t kunstwerk ‘Kleuren van Grathem’, bievuuerbeeld mèt ein sjiek silderie van oos kirk.
Oze prins Tim hieët ’t aafgeloupe jaor good opgeletj. Hae is gruuets op waat det d’r in Grathem in zón jaor allemaol gebuuertj en nog mieër op de minse die waat det doon en regele. Wae zeen vandaag tiedes de galazitting weer getuuge gewaestj van wieväöl luuj oos dörpke laevendj make en laevendj haoje. Mer d’r kin d’r mer eine Foekepotter van ’t jaor waere. Prins Tim is oetgekómme bie emes waat op häör gans eige meneer kluuer geuftj aan oos leef Grathem.
Dae titel waerdj speciaal toegekindj vuuer de bezunjere meneer woeë-op zie oos sjoeën dörpke en zien minse zuut en aan angere luutj kieke.
De titel Foekepotter van ’t Jaor geuftj ’t recht deze mèt trots en ieër te drage en is ouch bedoeldj as erkinning en stimulans. Det letste vuuer de drager, mer ouch zeker vuuer anger luuj.
Wie detj gae wetj kinne de Foekepotters eder jaor aan emes de titel “Foekepotters van ’t Jaor toe”. Dae titel is bedoeldj vuuer emes woeëvan prins en leje van oos club vinje det hae of zie zich op ein bezunjer meneer leutj kieke in oos dörp en op zien of häör eige meneer ein biedrage levertj aan oos gemeindsjap.
Wae doon dit sinds 2018. De Foekepotters van ’t jaor wore toet noe:
• Josine van de Bekker - 2018;
• Riek en Har Rietjens – 2019;
• Leje van de Vriewillige Brandjwaer Grathem-Kelpe-Oeëler – 2020;
• René en Mien Schreurs – 2023;
• De vriewilligers van ’t hoeskamerproject Grathem – 2024.
Wae winse Rosalie vuuel plezeer met huuere titel!
