Tim de Ieërste – Prins vanne Foekepotters Grathem in 2025
Mèt gezóndje spanning laefdje de Foekepotters en Foekepoterinnekes de aafgeloupe waeke toe nao ’t moment det de noewe prins vuuer ’t seizoen 2025/2026 bekindj zooj waere. Zón bietje róndj de fieëstdaag begós ’t sjpeculere. Waem zooj dit jaor de ker gaon trèkke?
Op 25 jannewari 2025 waas ’t zoeë wiet. Ieërst woor d’r nog de traditionele deenst in oos eige Sint Severinus kirk. Ónger ’t mótto Vrie en Blie waerdje ‘t mèt meziek van oos Borekepel en Noeri, Anieke en Ralf ein sjoeën en biezunjer bie-einkómst. Ouch waerdje de Voedselbank, oetgiftepuntj Baoksum, weer gesteundj mèt doeër de luuj mètgebrachte voedingsmiddele. Gesterktj met de zaengel van pesjtoeër waerdje vervolges nao Zaal Geraats getrókke. Dao óntvinge De Foekepotters häör zustervereiniginge van D’n Uul van den Grauwert oet Mofert, De Bôkkeriejers oet Sint Joeëst, de Plekploasters oet Baoksum en de Kwakkert oet Heitse mèt häör eige hoeëghede. ’t Prinsebal kós beginne.
Nao ’t aaftraeje van Prins Bert I waerdje ’t oetkeze van de noewe prins in henj gelachtj van eine magische “prinsesjpegel” dae waal zooi kinne vuuersjpèlle waem dit kieër gerope zooi zeen de Grathemse vastelaovesker te trèkke. Naodet inkele leje van de Foekepotters häör kandidaat aan deze sjpegel haje vuuergelagdj, kwoom ónger luid applaus en de toeëne van Door Diek en Dun (zónne goje höbbe wae ….) de noewe prins de bühne op. Nemes minder as Tim Houben, Prins Tim de Ieërste.
Tim is eine richtige Grathemse jong. Hae waerdje bienao zevenentwintjig jaor geleje geboeëre in ’t zekehoes in Wieërt, mer daonao rap nao thoes, Kasteelshof aan de Loordesjtraot in Grathem, verveurdj. Hae is noe dus zesentwintjig jaor. Tim is neet getrouwd, mer vrietj al inkele jaore mèt zien leef Marlou (Sillen) oet Sjwame. Net as Tim is Marlou gek vanne vastelaovendj. Zie is in eige dörp jeugdprinses gewaestj bie de Erpelkes. Tim woeënt nog altied bie pap en mam oppe Kasteelshof. Hae hieët drie jonger breurs die, net wie hae, van jongs aaf aan de henj oet de moewe höbbe gesjtoeëke in ’t fruitbedrief van vader Roger en moder Chantal.
Tim hieët de opleiding Mechatronica aan de Fontys hoeëgesjoeël in Venlo gevolgdj en daonao gewerktj bie Greymans Paktech in in Stramproy en vervolges in Venlo bie Sormac. Vuuer de ieërste óntwórp hae inpakmesjiene vuuer de voedingsmiddele-industrie, en bie dae letste mesjiene vuuer de greuntje- en fruitverwirking. Daovuuer zoot hae ouch dök in Amerika en Finlandj. Mer ’t blood kruiptj woeë ’t neet gaon kin, want inmiddels is Tim same mèt zien broor Tijs bie pap en mam in ’t bedrief gestaptj. Hae is ‘nne gruuetse fruitteler en same mèt zien broor al de veerdje generatie op Kasteelshof. En al hieët Tim krek wie zien broor get anges gelierdj, hae vindj ’t ein ieër en oetdaging óm aan waat opa en oma höbbe opgeboedj en pap en mam höbbe oetgebreidj, weer ein noew hoofdsjtök toe te veuge. Zoeë höbbe de breurs ein productielien opgezatte vuuer toelevering aan bekkerieje. Ouch höbbe zie zich toegelachtj oppe imkerie en is inmiddels echte Kasteelshofse honing te kriege, naeve appelesaap en sjroeëp van eige teeltj.
Tim is vanaaf 2012 lid van oos hermenie Sint Agatha en speeltj dao de tenor sax. Sinds 2016 versterktj hae daomèt ouch oos Borekepel. Det hieët hae van geine vraemdje, want mam waas vreuger lid vanne kepel in Kelpe-Oeëler. Ouch is Tim lid van ’t AJK (Agrarisch Jongeren Kontakt), heltj hae van motorrieje en waas hae lid en staflid bie JongNL. Aafgeloupe jaor leep Tim de Kennedymars.
Mèt de vastelaovendj laeftj Tim, dae normaal al neet van poppelappe is, nog net get heller as normaal. Zoeë lank wie hae zich kin herinnere duit hae al mèt aan de optocht. Ieërst in de bolderwage mèt mam en later same mèt pap en mam inne optochtgroep De Sjtuuekers en ouch bie de dames vanne Raod. Mer de letste jaore bie de eige vastelaoves en vrunjegroep V.G. Wurse Kwaod Óm. En, natuurlik is hae steeds vanne partie as oos Borekepel Door Diek en Dun acte de présence geuftj, woeëvan trouwes ouch zien drie breurs lid zeen. Eine goje pot beer en get sjaele kal is aan Tim waal besjtaedj en de vastelaovendj is hem mèt de appelmoos ingegaeve. As prins treutj hae noe in veutsjpoor van zien pap, Roger de Ieërste oet 2009.
Oze prins Tim de Ieërste zal tiedes de vastelaovendj waere óngersteundj doeër zien twieë adjudante: Mitchel en Mike. Hae zal bie de Foekepotters vuuerop gaon ónger ‘t mótto:
Appel of paer, ’t is mich óm ’t aeve
Wae gaon drie daag gaas gaeve!
De ganse proklamatie is hie te laeze.
