Tiedes ’t jeugdprinsebal op 20 jannewari 2024 waerdje Amélie Smeets en Devin van Zandvoort oetgerope es ’t noewe jeugdprinsenpaar van De Foekepotters in Grathem. Prinses Amélie de Ieërste en prins Devin de Ieërste sjtèlle zich gaer aeve aan uch vuuer.
Hoi. Ich bèn Amélie en twelf jaor geleje geboeëre in Remunj in ’t zekehoes, mer daonao rap nao hoes gekómme in Grathem en dao altied gewoeëntj. Ich höb ein breurke, Sebastiaan, en verder bestuit oos gezin oet pap Pascal en mam Chantal. Wae woeëne noe oppe Severinusstraot, mer det is toet det oos noewe hoes op Grasheim (’t aoje voetbalveldj) klaor is. Ich bèn lid van JongNL en vinj danse hieël sjiek. Edere waek gaon ich daovuuer nao danssjoeël Dédé Dance . Vastelaovendj vere vinj ich super sjiek, en det doon ich altied same mèt mien vriendin Liz. Wae verkleije ós den same en en doon in oze gelieke outfit mèt aan de disco, de kinjer- en groeëte optocht de sjoeëlvastelaovendj en alles waat d’r te doon is in ‘t Foekepotterslandj. Kei sjiek det Liz den ouch dit jaor mien adjudante is. Opa Jo oet Bieëgdje waas vreuger jaore lid van carnavalsvereiniging De Jokers en mien moder Chantal veertj dus al häör ganse laeve lank vastelaovendj. Dao zal ich ’t waal van höbbe. Ich vinj ’t super ruig det ich dit jaor jeugdprinses moog zeen en verheug mich d’r op óm d’r same mèt jeugdprins Devin, de adjudanten en de ganse jeugdraod ein tof fieëst van te make.
Ha. Ich bèn Devin, èlf jaor aod en vinj ‘t supertof det ich dit jaor es Devin de Ieërste jeugdprins bèn van De Foekepotters. Ich zit op sjoeël in Häör op de Latastesjoeël dao. Dao höb ich ’t super nao miene zin. Ich höb ein groeëte broor Jayden en ein jonger zuske Desney. Same mèt pap Remy en mam Jaqueline i soos gezin den compleet. Mien groeëte hobby is voetbal. Drie kieër in de waek bèn ich den ouch te vinje op ’t voetbalveldj in Kelpe woeë ich sjpeel in de jo13. Ouch höb ich lank taekwondo gedaon, mer dao bèn ich noe mèt gestoptj, ómdet ich dit jaor bie de jeugdbrandjwaer gaon. Ich vinj Xboxen ouch hieël vèt en es ’t waer good is kins se mich aan de bieëk zeen óm te vèsse. Zoeë, noe wetj gae get uuever mich. Ich höb d’r in elk geval väöl zin in óm mèt uch allemaol en mèt jeugdprinses Amélie, miene adjudant Guus en de ganse jeugdraod flink tegaenaan te gaon. Alaaf, alaaf, alaaf.
Devin I en Amélie I nuuedige uch oet vuuer häör receptie. Dae zal waere gehaoje op zaoterdig mèt de vastelaovendj geliek nao de kinjeroptocht. Det is bie Zaal Geraats en doortj ein klein eurke. Daonao gaon wae hosse op de disco van JongNL.
Laes hie de ganse proclamatie:
Ten ieërste: ‘t Geheim is vuuerbie, ‘t zjwiege is gedaon. Wae zeen gruuets óm dit jaor es jeugdprinsepaar vuuerop te moge gaon.
Ten twieëdje: Bedanke wae ‘t jeugprinsenpaar van veurig jaor, Bram en Pleun, vuuer ein sjoeën carnavalsseizoen. Oos wins om uch op te moge volge es prinsenpaar, is oetgekomme.
Ten derdje: Wille wae in ‘t bezunjer ouch ós aojers bedanke vuuer t sjtilhaoje van ós groeëte geheim en vuuer ‘t mèt helpe bie alle vuuerbereidinge
Ten veerdje: Wae doon de voetbal en danssjoon aan de kantj.
Wae gaon hosse mèt de jeugdraod en alle kinjer oet ’t Foekepotterslandj.
Ten viefdje: Mèt de Raod, Kapel en groeëte Prins vuuerop.
Zètte wae gans Grathem oppe kop.
Ten zèsdje: Aan de doorstroumtoets en aan sjoeël waerdj neet gedachtj, wae hosse en fieëste d’r op los mèt volle kracht.
Ten zevendje: Vastelaovenjd in Grathem mót ederein mèt make, wae gaon d’r namelik echt gets sjoeëns van make.
Ten achste: Det wae same eine sjoeëne Kinjeroptocht moge belaeve, en wae ós oppe Jong Nederlandj disco gans zulle gaeve.
Ten negendje: Tiedes de Groeëte optocht staon wae oppe waoge te zinge, te danse en te springe.
Loup de polonaise en sjloet gezellig mèt aan. Want vuuer det gae ‘t wètj, is de vastelaovendj gedaon.
Ten tieëndje: Hoeëpelik zeen Guus en Liz good oetgeröstj en blie, want wae höbbe ze gaer es adjudante aan ós zie.
Ten èlfdje: Det wae d’r same mèt uch eine sjieke vastelaovendj van zulle make, ónger ós motto:
Groeët of klein, vastelaovendj vere wae same mèt ederein!
