Wae sjrieve 18 jannewari 2025. Inne zaal bie Geraats luptj de spanning al aardig op, want ’t zal neet mieër lank dore of ’t noewe jeugdprinsepaar zal oppe bühne versjiene. Ieërst waerdje nog dankjewel gezagtj taege prinses Amélie en prins Devin die in 2024 bie de jeugd van de Foekepotters de scepter höbbe gezweidj. Toen waerdje ’t tied vuuer ’t oetroepe. Nao ein spannendje en wervelendje show waerdje Reva Cuijpers en Thijs van Heugten geïnstalleerdj as Jeugdprinses en Jeugdprins. Zie sjtèlle zich gaer aeve aan uch vuuer.
Prinses Reva I:
Hoi, ich bèn Reva. Ich bèn 11 jaor geleje geboeëre in Knotsenburg (Nijmegen) en op mien 3dje nao ’t Foekepottersriek verhoesdj. Mien pap hètj Ruud en mien mam Carolien. Ich haoj hieël väöl van häör. Same mèt ós leef kat Timmie woeëne wae oppe Baoksummerwaeg. Mien superleef oma en opa woeëne ouch in Grathem.
Ómdet ich hie neet geboeëre bèn, höb ich flink mèt papa geoefendj óm plat te kalle. Ich vinj ’t sóms waal nog ein bietje lestig, dus sjtèl neet te hoeëg eise aan mien Grathems plat.
Ich zit op tennis en dao höb ich ein hieël leuk en gezellig gruupke. Wae traine elke vriedig en höbbe 2 kieër per jaor ein toernooi.
Ouch sjpeel ich al 3 jaor saxofoon en det vinj ich hieël sjiek óm te doon. Ich bèn bie Jong Tumult. Aafgeloupe jaor höb ich mien A-examen gehooldj en noe moog ich bie de groeëte hermenie. Dao bèn ich best gruuets op.
Elke maondig gaon ich nao JongNL, woeë ich mèt de meide en de gezellige leiding sjieke activiteite doon.
Eine angere hobby van mich is laeze. Beuk van Carry Slee, Donald Duck en Harry Potter laes ich ´t leefst. Ich haoj van sjpannnendje beuk die ouch grappig kinne zeen. Ich kin dao gans in opgaon. Ich höb ouch bienao alle films van Harry Potter gezeen, want ich bèn eine echte fan van hem. Ouch vinj ich Donald Duck leuk; elke vriedig viltj d’r ein Duckie inne bös.
Ich vinj ’t geweljig det ich same mèt Thijs, mien adjudant Julia en de jeugdraod deze vastelaovendj vuuerop moog gaon. Ich höb d’r hieël väöl zin in óm vastelaovendj same met mien familie en vrunj en uch allemaol te vere.
Prins Thijs I:
Hoi. Ich bèn Thijs en ich bèn 12 jaor. Ich woeën al 11 jaor in Grathem op oos boorderie aanne Hunselerdiek. Dao woeën ich same met miene pap Jules en mam Femke en mien breurke Wout, en mèt oos diere (eine hóndj, ein kat, drie paerd en hieël väöl kuukskes).
Ich bèn eine actieve kaerel en hoof mich neet te vervaele. Leefst sjpeel ich mèt mien vrunj en breurke boete en as ’t sjlecht waer is lekker inne loeëds. Ich vinj ’t sjiek as ich pap kin helpe mèt kukes laje of bie get anges. Later wil ich zelf ouch gaer kukeboor waere.
Mien paerdrielaarse höb is verwisseldj vuuer voetbalsjoon en ich sjpeel inds kort bie DFO’20 in Kelpe.
Verder tennis ich gaer ein pötje bie T.C. De Koel en bèn ich lid van JongNL. Ouch zet ich mich in bie de jeugdbrandjwaer in Nederwieërt.
Ich vinj ’t super ruig det ich noe same mèt Reva ’t jeugdprinsepaar moog zeen in 2025. Same mèt häör en mien adjudant Sjir, de jeugdraod en alle kinjer gaon ich d’r ein sjiek fieëst van make.
Prinses Reva I en jeugdprins Thijs I gaon regere onger huuer motto:
Mèt tennis ff geine bal sjlaon, den kinne wae mèt dees daag d’r hieëlemaol vuuer gaon!
Laes hie de ganse proklamasie:
Wae, Thijs de Ieërste en Reva de Ieërste,
jeugdprins en jeugdprinses vanne Foekepotters in ’t jaor 2025, verklaore bie deze
Ten Ieërste Devin en Amelie bedanktj vuuer aafgeloupe jaor,
mer noe zeetj gae echt klaor
Ten Twieëdje Vanne Baoxemerweeg toet de Hunselerdiek
Det is ós Foekepottersriek
Ten Derdje Boete bie de optochtj of binne inne zaal,
Wae make mèt hieël de raod van 11 väöl kabaal
Ten Veerdje Ich laot mien jeugdbrandweerkleijer ff inne kast hange
en ich laot de saxofoon ff sjtaon óm mèt uch in eine groeëte polonaise vuuerop te gaon
Ten Viefdje Mèt de JongNL disco gaon wae same met uch sjwinge
En lekker hel mèt de muziek mèt zinge
Ten Zesdje Oos tennisracket blieftj noe inne tas
Det gebroeke wae nao de vastelaovendj pas
Ten Zevendje Oos sjoeël de Klink is mèt vastelaovendj gelukkig neet aope
Anges haaje wae dao toch allein mer lègke te sjlaope
Ten Achste Ein drök programma mèt Sjleuteleuverdrach, optochtj en Bachus verzoepe
Gae moogtj vuuerluipig nog neet nao hoes toe kroepe
Ten Negendje Det oos pap en mam de kómmendje tied vuuer ós klaor zulle sjtaon
En deze vastelaovendj achter ós aan mótte gaon
Ten Tiendje Wae laote mèt trots weite,
det oos adjudante Sjir and Julia heite
Ten Èllefdje Det wae d’r samen ein groeët fieëst van zulle make ónger oos motto
MET TENNIS FF GEINE BAL SJLAON,
DEN KINNE WAE MÈT DEES DAAG D’R HIEËLEMAOL VUUER GAON
