Mieër info bóntje aovendje!
De bóntje aovendje waere dit jaor in ein noew jeske gesjtoeëke. Waat det vuuer uch geit beteikene, zulle wae in ‘t kort gaon oetlègke.
Op de vriedig haoje wae, zoeë es gae det al jaore van ós kintj, de tradisionele Bóntje Aovendj. Waal gaon wae dao extra ruumdje make vuuer de seniore oet oos dörp, zoeëdet die ouch mèt kinne genete van ein volledig programma, gebrachtj doeër oos eige Grathemse artieste. Dae aovendj sjtartj om 19.30 oor en vuuer de minse vanne seniorevereiniging die sjlecht ter bein zeen, zal verveur geregeldj gaon waere. Die waere den thoes opgehoeëldj en nao de bóntje aovendj weer netjes nao hoes gebrachtj. Doeër dees noewe opzèt zal de senioremiddig op zunjig kómme te vervalle. Mieër informasie vuuer de seniore volgtj later nog doeër t besjtuur van häör vereiniging.
De zaoterdig waerdj ómgetoverdj toet ein heus “Bóntje Aovendj Fest” waat begintj om 20:00 oor. Ónger 't genot van ein hepke en ein drenkske kintj gae den same mèt euch vrunj en/of vriendinne aan ein beertaofel gaon genete van oos Grathemse artieste. Tösse de sjtökke doeër moogtj gae efkes de bein sjtrekke mèt oppe achtergrondj ein lekker meziekske.
Wie kintj gae d’r noe vuuer zörge det gae mèt euch vrunj en/of vriendinne same aan zoeë’n beertaofel kómtj te zitte? Gae kintj es vanouds ein entreekaertje koupe. Gae höbtj den kans op ein zitplaats, mer mótj den waal nog oppe tied nao de zaal kómme! D’r zulle neteurlik ouch genóg sjtaontaofels nieërgezatte waere woeë gae mèt 'nne groep aan kintj gaon sjtaon. Ouch zeetj gae vriej om euch eige borrelhepkes mèt te bringe.
Wae hope uch enthousiast te höbbe gemaaktj en zeen uch gaer op 12 of 13 jannewari op ein van dees twieë sjieke aovendje!
