Höbtj gae de Foekepotters 7x11 jubileumpuzel al?
Puzele is in! En waat is sjoeëner as eine puzel van en uuever oos sjoeën dörpke en den sjpeciaal uuever de Grathemse vastelaovendj? Zónne puzel is d’r noe, want bie ‘t 7x11 jaorig jubileum presentere De Foekepotters uch eine unieke Grathemse ‘vastelaovespuzel’. ’t Ontwèrp van deze puzel is van teikenieër Ludie Haenen oet Mestreech, eine aod collega van inkele Foekepotters. Hae hieët zich daobie laote inspirere doeër de Grathemse vastelaovendj en de minse die det fieëst eder jaor weer same make. Hae gebroekdje daovuuer inkele lochtopnames die tiedes de optochtj zeen gemaakjt en ein flinke bössel foto’s daovan. Hae leet zich inspirere doeër de sjtiel van de fameuze puzelteikenier Jan van Haasteren. De bóntje verzameling van minse inne optócht en de vastelaovendj is trök te zeen inne puzel. Same gaeve zie ein kläörriek beeldj vol bewaeging en actie. Versjillendje creaties oet de optochte doeër de jaore haer zeen ouch trök te vinje. ’t Gehieël aomtj ein fieëstelikke sfeer. Ludie vónj ’t soms lestig te keze tösse waat waal en neet in de puzel terecht zooj kómme. ’t Aantal creaties en figure in aanbod waas erg groeët, zoeë goof hae aan. Mer, det leetj zeen det de Grathemse vastelaovendj volop laeftj. Get óm te koestere, aldus Ludie. Hae hieët zien bèst gedaon d’r get sjieks van te make en det is hem mieër as gelöktj. Deze puzel is ein sjiek aandinke aan oze fijne vastelaovendj en ein unieke oetgave bie ós jubileum. Wae zeen d’r in eder geval hieël gruuets op en winse uch mèt Ludie väöl plezeer bie ’t lègke van dae puzel.
De puzel kóstj € 15,00 en is te kriege in de vuuerverkoup via oze website.
As gae ‘m dao bestèldj vuuer 4 december bezörge wae ‘m vuuer pekskesaovendj bie uch.
Nao 4 december höbs se kans det 't get langer op zich laotj wachte.
D'r is ouch ein mäögelikheid om de puzel op te hoeële, namelik elke maondig, dinsdig en woonsdig tösse 15:00 oor en 18:00 oor op 't vólgendje adres:
Frisostraat 44
6096BG, Grathem
Daonaeve sjtaon wae mèt de puzels oppe kerstmertj van JongNL Grathem op zunjig 7 december, inclusief inpak service vuuer de fieëstdaag!
Ouch kins se os vinje oppe Vastelaoves Sjommelmertj vanne Bacchusklup Grathem op zunjig 18 jannewari.
Besjtèlle vanne de 7x11 jubileumpuzel kin hie:
https://foekepotters.nl/form/bestellen-puzzel
