𝟏𝟏-𝟏𝟏 𝐬𝐣𝐭𝐞𝐢𝐭 𝐯𝐮𝐮𝐞𝐫 𝐝𝐞 𝐝𝐮𝐮𝐞𝐫! 𝐇𝐨̈𝐛𝐬 𝐝𝐢𝐜𝐡 𝐚𝐥𝐥𝐞 𝐝𝐚𝐭𝐮𝐦𝐬 𝐠𝐞𝐧𝐨𝐭𝐞𝐞𝐫𝐝𝐣?
Dit jaor vere wae ós 7x11 jaorige besjtaon! Daoróm organizere wae dit jaor allerlei specials!
𝐙𝐚𝐨𝐭𝐞𝐫𝐝𝐢𝐠 𝟏𝟎 𝐣𝐚𝐧𝐧𝐞𝐰𝐚𝐫𝐢
Zoeë rope wae dit jaor op eine daag ós jeugdprinsepaar (‘smiddigs) en jubileumprins (‘saoves) oet!
Tiedens 't jeugdprinsebal - bie Geraats - höbbe wae drie geweldige optraejes: Heite Hinne, links rechts en DevilDex.
𝟕𝐱𝟏𝟏 𝐣𝐮𝐛𝐢𝐥𝐞𝐮𝐦𝐰𝐞𝐞𝐤𝐞𝐧𝐝
Óm ós jubileum extra kläör te gaeve, organizere wae ein 7x11 jubileumweekend. Gluif ós, hie wils se bie zeen want wae verklappe nog neet alles waat uch te wachte sjteit tiedens ein van dees aktiviteite.
𝐉𝐮𝐛𝐢𝐥𝐞𝐮𝐦𝐜𝐚𝐟𝐞́
Op vriedig oeëpene wae bie Geraats, ós jubileumcafé, woeë ederein in Grathem welkom is. Wae hoeëpe alle aod jeugdprinsepare, aod prinse, lede vanne kepel, optochtdeilnummers of anger luuj die zich verbónje weite mèt de vastelaovendj, dao te moge ontvange. Wae prooste den gaer same mèt uch op oze mijlpaal. Det kan óngerangere mèt ein Hertog-Jan beerpreuverie, woeë mèt se dichzelf kins omtovere toet ware hertog (inclusief attribute die se kins verzamele). Óm ós café hieëlemaol toet laeve te bringe, zal Ger Frenken ein ode aan Pierre Cnoops bringe mèt zien buut.
𝐓𝐞𝐧𝐭𝐨𝐞𝐞̈𝐧𝐬𝐣𝐭𝐞̀𝐥𝐥𝐢𝐧𝐠
Op zaoterdig 24 jannewari oeëpene wae inne Nassaurie ein 7x11 Foekepotters tentoeënsjtèlling. Dees is georganizeerdj in samewirking mèt de minse van 'Grathem in beeldj'. Tiedens dees expositie kieke wae trök op 77 jaor gesjiedenis van ós sjoeën vreneging. Verwacht sjoeën aoj foto's van vreuger en bekiek vuuerwèrpe, zoeë wie, aoj sjteke, aoj scepters of anger vuuerwèrpe oet ós archief.
𝐅𝐢𝐞𝐞̈𝐬𝐭𝐚𝐨𝐯𝐞𝐧𝐝𝐣
Op zaoterdig 24 jannewari is 't ‘saoves tied vuuer 't hoeëgdjepuntj van ós jubileum, namelik de fieëstaovendj. Verwacht spektakel, sjieke meziek en det echte vastelaovesgeveul! Nemes minder as fieëstband Bieske, Van Lieshout & Arts en Henk & Ton vanne Janse Bagge Bend zulle vuuer ós gaon optraeje. Deze aovendj zulle wae mèt ein kleine entree gaon wirke van €7. Kaertjes zeen bènnekort te koup.
𝐉𝐮𝐛𝐢𝐥𝐞𝐮𝐦𝐫𝐞𝐜𝐞𝐩𝐬𝐢𝐞
Wae sjloete 't weekend aaf mèt oos jubileumrecepsie. Róndj 16.00 oor zal Rempetemp kómme optraeje. Aete kintj gae bie ós inne zaal want wae zulle bruuedjes frikkedel verkoupe.
𝐁𝐨𝐧𝐭𝐣𝐞 𝐚𝐨𝐯𝐞𝐧𝐝𝐣 (𝐟𝐞𝐬𝐭)
De lètste aktiviteite vuuer 't 7x11 seizoen echt zal losbarste zeen natuurlik oze Bóntje Aovendj en 't Bóntje Aovendj Fest. Woeëbie de bóntje aovendj besteit oet 't aoje en vertroewdje concept mèt sjteul. 'T Bóntje Aovendj Fest kintj gae as 't vernoewdje concept, mèt beertaofels en de mäögelikheid óm uch eige hepkes mèt te numme. Lèt op, dit jaor sjtarte allebei de aovendje óm 19:30 oor. Kaertjes zeen bènnekort te koup.
