U bent hier

Vastelaovendj in Grathem 2022. Waat noe..!

Leef Foekepotters en Foekepotterinnekes,

Allemaol höbbe wae helaas nog steeds last van dae Corona en de maotregele die daobie huuere. Op de ieërste plaats dinke wae daobie aan de luuj die doeër Corona zeen getroffe en de luuj in de zörg.

Wae as Foekepotters mótte daobie bedinke waat dit beteikentj vuuer oze vastelaovendj. ‘nne Vastelaovendj wie wae dae kinne en gaer wille vere, zitj d’r in dees situatie helaas neet in.

Waat kin neet?

In jannewari zeen alle activiteite aafgelastj. Det beteikentj det d’r gein Bóntje Aovendje zeen, en geine Seniorenmiddig. Ouch de Vastelaovesmès en ‘t Prinsebal gaon neet doeër.

En, geine noewe prins!

Wae höbbe besjloeëte óm in 2022 geine noewe groeëte prins oet te rope. Ónger de huidige ómstandighede is ‘t neet mäögelik óm same ein sjoeén fieëst te make en oze prins dao-in zien rol te gaeve zoeë wie wae hem dae gaer gunne. Dit is in good uueverlèk mèt oze kandidaat prins besjloeëte. Hae waas d’r gaer mèt uch vol vuuer gegange, en belaoftj in eder geval volgendj jaor twieë kieër zoeë hel te gaon.

Mer waat waal?

Wae blieve dinke uuever waat eventueel es alternatief mäögelik is. Dao veltj noe nog neet alles uuever te zegke. In eder geval waertj d’r eine jeugdprins en ein jeugdprinses oetgerope. Wae zulle kieke welk programma häör en de jeugd geboje kin waere binne de mäögelikhede die d’r den zeen. Ouch vuuer de rest van ‘t vastelaovesprogramma kieke wae waat de eventuele alternatieve zeen. Dao-uuëver huuertj gae nog van ós.

Is ‘t det den?

Neet gans, want wae dinke ouch nao uuever ein zomeractiviteit. Ouch dao kómme wae op trök.

Vuuer noe, blief gezóndj, bun leef vuuer einanger en haod vastelaovendj in uch hert.

C.V. De Foekepotters