U bent hier

CD project Prins Ralf I en de Nuuj Helde

Oose Prins Ralf is eine muzikale jong. Mèt de vrinj van de Nuuj Helde hieët hae ein noe versie opgenomme van ’t Grathems volksleed. ’t Ontsjting es ein spontaan idee. De men zatte zich bie-ein en ’t resultaat moog d’r zeen. Ein sjieke rockversie van oos eige volksleed. ’t Filmke mèt wie dit is óntsjtange steit inmiddels op faceboof en youtube. Inmiddels is det ouch op CD gezatte en zal dees versie tiedes de vastelaovendj te koup zeen. Det is natuurlik ein sjiek höbbedink vuuer ‘nne Foekepotter.

Mer, d’r is mier. Want de opbringst van de cd-verkoup waerdj doeër prins Ralf en de Nuuj helde besjikbaar gesteldj vuuer ein good doel. Waat is ’t geval? Die men höbbe ’t plan opgevat óm volgendj jaor tiedes ‘t 6x11 jaorig jubileum van De Foekepotters ein cd oet te bringe mèt Grathemse vastelaovesmeziek. Dus meziek gemaaktj doeër Grathemse luuj, uuever Grathem of gewuuen meziek dae se in oos dörp mèt die daag väöl huuers. De Nuuj Helde en Prins Ralf zölle de ker gaon trekke, mer ouch zeker angere Foekepotters bie ’t project betrèkke. Van hermenie toet drumband en van jònk toet aod, ederein kin mèt doon.

De Foekepotters zeen blie mèt dit sjieke initiatief en hoeëpe det ederein dit wiltj steune doeër ein of mier cd’s te koupe. Vuuer de pries hooftj gae ’t neet te laote, want det is net get mier es ein glaeske beer.

Dit initiatief waerdj óngersteundj doeër Café-Zaal Geraats.