U bent hier

Red Nose Foundation als goed doel

De Foekepotters steune project vuuer kinjer in sloppewieke - The Red Nose Foundation op Jakarta.


Eder jaor wille de Foekepotters ein good doel óngersteune. Det doon wae den met ein symbolisch bedraag. Dit jaor liktj det doel neet naeve de duuer, want wae höbbe gekoze vuuer de Indonesische stichting Yayasan Hidung Merah op Java in Jakarta. Vertaaldj beteikentj det: Stichting de Roeij Naas. Dees stichting waerdje opgerichtj in 2008 wie eine Amerikaanse kloon doeër Indonesië reisdje en daobie vuueral optrooj in de sloppewieke. Dit hieët hem zoeë gegrepe det hae ’t jaor dao-op trök ging óm es vriewilliger circusworksjops te gaeve aan kinjer. De Roeij Naaze wille de kinjer in de sloppe­wieke van Jakarta aafleiding beeje. Aeve weg oet de ellendige sleur van ’t bestaon dao en gewuuen lol make. Ein bietje dus wie mèt de vastelaovendj. Circus is daobie nog steeds belangriek. Mer, zie doon ouch aan de ontwikkeling van de kinjer doeër ze activiteiten aan te beeje op ’t gebied van meziek, sjport en sjpel en creatief bezig zeen. Daonaeve gaeve zie de kinjer ouch extra les in bievuuerbeeldj Ingels en raekene, woeëmèt zie de kinjer ein basiskinnis mèt wille gaeve zoeëdet ze zich get baeter kinne redde in de maatsjappie. Ouch is d’r ein project woeëbie mèt hulp van allerlei locale bedriefkes en vriewilligers sjoeële waere opgeknaptj.
‘nne Grathemse Jong, namelik Gijs Daemen, is ’n paar waeke trök aafgereisdj nao Indonesië óm bie dees stichting inkele maondje vriewilligerswerk te gaon doon. De Foekepotters vinje det ’n compliment waerd en wille det wie gezagtj óngersteune. Gijs hieët van ós ein gift van hongerd euro mètgekrege en hieët d’r inmiddels vuuer gezörgdj det dit bie de Roeij Naaze op ein gooi plek terecht is gekómme.
 
Mier informatie uuever de Roeij Naaze, stichting Yayasan Hidung Merah, vindj gae op  www.rednosefoundation.org