U bent hier

Raamposter "Vastelaovendj in Grathem"

In 2015 bestuit CV De Foekepotters 6x11 jaor. Ein jubileum dus. Bie gelegenheid daovan wille de Foekepotters de Grathemse luuj ein herinnering aanbeeje, es dank vuuer häör steun in de aafgeloupe 66 jaor en es oetnuuediging óm ouch deze vastelaovendj weer toet ein sjoeën fieëst te make. Daovuuer is gekoze vuuer eine poster dae doeër de leje van carnavalsvereiniging aan de minse in ’t dörp aangebooje waerdj.
 
’t Ontwerp van de poster is gemaaktj doeër Rick Sonnemans. Eine echte Grathemse jong, aod jeugdprins en wie bliektj, eine richtige kunstemaeker. ’t Thema is feitelijk, De Foekepot en Grathem. ’t Beeldj is opgeboedj oet versjillendje vlakke, woeëbie de basis waerdj gevormdj doeër de plattegrondj van Grathem. Hie in zeen wae eine get abstract weergegaeve Foekepot trök kómme. Dae uueverlaptj oos dörpke en löptj deils ouch mèt de ómtrek daovan mèt. In dees vorm zeen inkele markante puntje oet Grathem aangegaeve, zoeë es de watermuuele, de kirk, de mertj en natuurlik ‘t Foekepottermenke. Inkele van de sjoeën dinger die ós dörp te beeje heet.
 
Die puntje waere doeër ein lienespel mètein verbonje. Binne de vlakke zeen foto’s geplaatstj die ein sfeerbeeldj gaeve van de Grathemse vastelaovendj. Doeërdet de liene de verbinjing binne Grathem weergaeve, de foto’s aangaeve wie in Grathem vastelaovendj waerdj geveerd en dit alles waerdj omvatj doeër de Foekepot, waerdj de symbolische beteikenis duudelik. De vastelaovendj in Grathem is ein sjoeën fieëst det ós same bringtj en same bintj. 
De poster is speciaal ontworpe vuuer ’t jubileum, mer is ouch ein blievendje herinnering en mesjien ouch waal eine oproop óm d’r ouch de kómmendje jaore same eine sjieke vastelaovendj van te make in Grathem.
 
Alaaf.