U bent hier

Prins Wil I ; 6x11 Jubileumprins vanne Foekepotters

Op 24 jannewari 2015 waas ’t zoeë wiet. Vuuer de 6 maol 11e kier repe de Grathemse Foekepotters häöre Prins oet. Dit kier waas det natuurlik extra spannendj ómdet ’t jubileum is. Waem zooi de ker gaon trekke en bie De Foekepotters vuuerop gaon? ’t Raoje en de geruchte wore neet van de locht. Mer oeteindelik kwoom ’t verlossendje woeërd. Wil Daemen is de 66e prins van De Foekepotters.
 
Wil waerdje 3x11 jaor geleje geboeëre, woeëntj sinds zien zesdje laevesjaor in Grathem en is op väöl plaatse actief in ’t dörp. Hij vollybaltj en speeltj tennis bie TC De Koel. Hae is al 26 jaor lid van JongNL (Jong Nederlandj), woeëvan de letste zestieën jaor es vriewilliger en staflid. Sinds 2009 is Wil vuuerzitter van JongNL Grathem. Hae sjting mèt aan de basis van ’t noewe Jeugdhoes det in 2012 waerdje geuuependj. 
 
Wil kömtj oet ein echt vastelaovesnest.  Vader Jo waas jaorelank es Einzelgänger in de optocht te zeen en duit elk jaor mèt aan de bontje aovendje. Mooder Mieke noom meistal naoldj en draod ter handj óm de hieële familie in sjieke pekskes te staeke of óm vuuer vastelaovesgroepe kleijer te make. De twieë zusse van Wil, Kristel en Nicole, zeen lid van de vastelaovesgroepe ‘De Pruuke’ en ‘De Stuuekers’. Met de vrinjegroep ‘De Naeve’ boedje Wil in ’t verleje väöl sjoeëne en prieswinnendje wages vuuer de optocht, en ouch hae sjting mierdere kiere oppe bühne mèt de bontje aovendje. Vanaaf 2006 is Wil lid van C.V. De Foekepotters en ouch dao ein van de kertrekkers. Zoeë is hae sinds ein paar jaor lid van ’t bestuur en penningmeister.
 
Wil is in zin dageliks laeve inkouper bie ’t academisch zekehoes Mestreech (azM). Dao heldj hae zich bezig met de inkoup van versjillendje faciliteite die ’t zekehoes nuuedig heet, zoeë wie bievuuerbeeldj operatiekamers en de inrichting daovan. Wil is nog vriegezel. Hae kin enorm genete doeër mèt gooj vrinj lekker te gaon aete en ein fijn glaas wien of ein good glaas beer te drinke. En ouch eine fijne whisky is aan Wil waal besteedj. Met inkele aod studiegenote waerdj tenminste eine kier per jaor ein culinaire weekendtrip onggernomme.
 
Prins Wil I heet vuuer dit jubileumjaor gekoze vuuer twieë adjudante mèt ervaring, namelik Rob Evers en Vincent Rommelaars. Rob is neet allein eine gooje vrindj mer ouch de sjoeënbroor van Wil, want getrouwdj mèt zus Nicole. Wil is paetome van häör aodste dochter.
Rob waas prins in 2010. Vincent, prins in 2008, is ‘nne jeugdvrindj van Wil en waas ouch lid  van vrinjegroep ‘De Naeve’. 
 
Wil I zal De Foekepotters vuuergaon ónger zien motto:
6 kieër 11 sjleit de maot, Vastelaovendj in Grathem, mèt jonk en aod!